Ovadali va pulwa va yandje omhitokounona va shange omakonakono

Ovadali otava indilwa va yandje omhito yelimweneneno momaumbo opo ounona va dule okulilongekidila omakonakono avo opexulilo lomudo. Omakonakono oo e li metifa paife otaa ka xula momafiku 11 Novemba. Omupedu presidente wEhangano lOpashiwana lOvadali mEhongo Salome Kambala okwa ti ovadali ove na oshinakuwanifa sha fimana melihongo lounona vavo opamwe novahongifikola newiliko lofikola lokukwashilipaleka kutya ova longekidilwa nawa omakonakono avo. Okwa indila ovadali va shonopeke oilonga yomomaumbo nokupiyaaneka ounona inashi pumbiwa, manga yo tai indile ounona va fiye po omalungula noinima ikwao oyo tai dulu okuya elitulemo lavo moshipala.

“Ovadali navo ove na oshinakuwanifa shokuyandja omudingonoko u li xwepo momaumbo opo ounona va dule okulesha, va twikile okukala ve na omukumo ndele tava eta po osho tava dulu,” osho a ti ngaho Okwa indila ovadali va yandje eenhele dokulihongela de limwenenena, tava yandje efimbo la wana lokutala po pomambo ndele tava kwashilipaleke kutya ounona ova lya oikulya tai tungu, ove na oikutu ya yela nova mona eemofi da wana pefimbo lomakonakono. “Puleni omapulo, pwilikineni ounona veni, taleni osho va pumbwa ndele tamu kufa eenghatu da fimana mu va yambidide,” Kambala ta ti. Okwa weda po kutya nande ofamili oi na omumbwe yoshimaliwa, etwomukumo nomudingonoko uha di ombili otau dulu okweeta elunduluko liwa. Omudali Paulus Mbangu okwa ti ounona natango otava dulu okulonga oilonga yomeumbo, ashike nai shonopekwe pefimbo lomakonakono opo va mone efimbo la wana lokulilongekida. Okwa ti ovadali navo nava yakule mo ounona ndele tava tula po efimbo lomondjila lokulihonga, loilonga yomeumbo, lokulya nokufuda po. “Ekonakono ola pumbwa elongelokumwe meumbo. Ovadali nava yambidide ounona vavo ponhele yoku va twika omikundu. “Ohandi pula ovadali aveshe…