Ovalandifi vokapana nava yambididweneemiliona N$10 – Mbundu

Oshilyo shongudu yoRepublican Party mopaliamente Mathias Mbundu okwa pula epangelo li tule po oshimaliwa shi fike peemiliona N$10 shi yambidide ovalandifi vokapana novalandifi vombelela momapandaanda ovo ongeshefa yavo ya iwa moshipala komukifi wekondo nelaka. Mbundu okwa ti omilandu odo da tulwa po kukelelwe omukifi wekondo nelaka oda ya ongeshefa yombelela moshipala, osho sha kuma unene oiyemo yovanhu ovo va tala mokulandifa ombelela va dule okuyambidida eefamili davo. Eshi okwe shi pula pefimbo kwa li ta kufa ombinga meenghundafana domutengenekwafaneko womudo woshimaliwa 2026/27 womokati komudo mOmutumba wOpashiwana. Namibia okwa didilika omukifi wekondo nelaka omwedi wa dja ko.

Mbundu okwa ti epangelo nali amene oshikondo shoimuna ashike nali tale yo komikundu doshimaliwa dovalandifi vombelela da etwa komukifi ou. Okwa ti ovalandifi vahapu vomomapaandaanda ove likolelela mokulandifa ombelela va lande oikulya, va fute ohiila nokuyambidida ounona vavo. “Onghee nee ohandi indile nefimaneko linene opo omufimanekwa minista a tote po oshikefa shoshimaliwa sheemiliona N$10 di yambidide ovalandifi vOkapana ovo omaxupilo avo a kumwa nai neenghono komilandu da tulilwa po omukifi ou,” osho a ti ngaho. Mbundu okwa hala Oministeli yOshimaliwa i longe neeministeli dikwao nomalelo eedoolopa va tofe mo ovalandifi ovo va kumwa unene konghalo ei. Okwa ti epangelo nali konakone oshimaliwa osho va kanifa, tali tale kutya ova pumbwa eyambidido li fike peni ndele tali toto po omulandu wokuninga omaindilo upu.…