Ovanamibia otava twikile nokuninga eehepele – Swartbooi

Omuleli wongudu yoLandless People’s Movement (LPM) Bernadus Swartbooi okwa ti onghalo tai ningi ondilo noiyemo i li pedu otai undulile Ovanamibia meengunga di na ondilo. Swartbooi okwa ti omwaalu uhapu wovanhu tava ka lya eengunga otau holola nghee Ovanamibia tava mono oixuna. Edi okwe di popya mOmutumba wOpashiwana Etine pefimbo kwa li ta kufa ombinga meenghundafana domutengenekwafaneko womokati komudo. Ovayandji veengunga ova didilika okulya eengunga kwa ya pombada neepelesenda di li o27, da ya fiyo opeebiliona di li N$9. 3 metatamudo lo2026. Ovanamibia ve li lwopo279 500 ohava li eengunga. “Eshi otashi ti Ovanamibia vahapu ove li momumbwe yoshimaliwa ile oshike tava kufa omikuli di na ondilo?

Ile oshinima eshi ongeshefa iwa moshikondo shomayakulo oimaliwa? ” osho a pula ngaho. Swartbooi okwa pula ngee ovanhu ohava ka lya eengunga kovayandji veengunga shaashi oshipu okuyelakanifa neembaanga. “Efimbo oli na oku shi holola, ashike eshi kashi shii oshinima shiwa. Eshi oshinima tashi monifa Ovanamibia oixuna,” osho a ti ngaho. Swartbooi okwa ti okweehela taku hapupala okwe ya pefimbo Ovanamibia vahapu tava nyengwa okuliwanifila po eemumbwe davo. She likolelela komivalu dehangano lomavalulo opashiwana moshilongo, ovanailonga vahapu ohava mono oiyemo i li koshi yoN$2 000. Okwa ti kutya onghalo yomaxupilo oya ya nai moule womido nhatu da pita. Swartbooi okwa ti omumbwe yoshimaliwa otai denge nOvanamibia ava hava longo, mwa kwatelwa ovahongifikola novapangi ovo itava dulu okulanda nomaumbo.…