Tíst Lavrovs alvarlegra en tíst Heimis Más

Þorgerður Katrín Gunnarsdóttir utanríkisráðherra sér ekki ástæðu til að elta ólar við færslu Heimis Más Péturssonar á samfélagsmiðlinum X, þar sem hann eggjaði Frakklandsforseta til að hóta kjarnorkuvopnaárás á Rússland. Hún hafi hins vegar mun meiri áhyggjur af því að „fyrrum forráðamaður íslenskra stjórnvalda“ hafi dreift færslu frá utanríkisráðherra Rússlands. Stefán Vagn Stefánsson, varaformaður Framsóknarflokksins, spurði utanríkisráðherra út í færslu Heimis Más í óundirbúnum fyrirspurnartíma á Alþingi. Heimir Már baðst afsökunar á færslunni eftir að um hana var fjallað og eyddi reikningi sínum á X. Stefán Vagn sagði færslu Heimis Más grafalvarlega í ljósi þess að hann gegni ábyrgðarstöðu fyrir einn af þremur ríkisstjórnarflokkum.

Velti hann því upp hvort færslan geti valdið Íslandi orðsporsáhættu og hvort utanríkisráðherra hafi rætt ummælin við samstarfsflokkana í ríkisstjórn. „Er það bara nægilegt að viðkomandi segi bara: Nei, ég hefði kannski ekki átt að gera þetta og ég lofa því að gera þetta ekki aftur og svona til að tryggja að þetta gerist ekki þá er ég hættur á þessum miðli. Eru það einu viðbrögð okkar í þessu máli? “ spurði Stefán Vagn. Þorgerður Katrín sagði færslu Heimis Más ekki í neinu samræmi við stefnu Íslands. Það lægi skýrt fyrir að Ísland væri fylgjandi kjarnorkuafvopnun. Hún ítrekaði að Heimir Már hefði beðist afsökunar á færslunni en undraðist á sama tíma að stjórnarandstaðan hefði tekið þetta mál upp en látið aðrar og alvarlegri færslur á X liggja á milli hluta. „Þá sagði enginn í stjórnarandstöðunni neitt þegar tíst kom frá…